ඔබට මතක ඇති ආරණ්‍යක වැඩ සිටින වයෝවෘද්ධ මෙහෙණින් වහන්සේනමක් පිළිබඳව මීට පෙර අප සඳහන් කළා. ඔක්කම්පිටිය ප්‍රදේශයේ සිදු කළ ගැබිනි මව්වරුන්ගේ ව්‍යාපෘතියේදී දැනගන්නට ලැබුන තොරතුරක් අනුව අපි උන්වහන්සේ බැහැදකින්න ගියා. මතකද ඔබට අප සඳහන් කළා මේ මෙහෙණින් වහන්සේ සිටින ආරණ්‍යයේ අවම පහසුකම්වත් නොමැති බව. එම ආරණ්‍යයේ නොතිබූ පහසුකම් සපුරාලීමට හැකි නම් ඉතා අගනා බව සිතුණ නිසාම ඒ පිළිබඳව දැනුම් දුන් වහාම ඒ වෙනුවෙන් අපි එක්ක ෆේස්බුක් මිතුරෝ ගොඩක් එකතු උනා. ඒ සියල්ල ලබා දුන් අපට ඉන්පසුව නෙත ගැටුන කරුණක් වූයේ මෙම ආරණ්‍යට භාවිතය වෙනුවෙන් ජලය නොමැති බව විශාල අඩුපාඩුවක් බවයි.
මේ ආරණ්‍ය තියෙන්නේ බොහොම දුෂ්කර මඟක නිසා ජලනල පහසුකම් නැහැ. මෙහෙණින් වහන්සේගේ ඇස් පෙනෙන්නෙත් නැහැ ඇවිදින්නත් බැහැ. ඉතින් පිරිසිදු කිරීම් කටයුතු කරන්න කෙනෙක් වෙනම ළඟ ඉන්න ඕනමයි. අනූ වැනි වියටත් කිට්ටු මේ මෙහෙණින් වහන්සේහට උපස්ථාන කරන්න නැන්දා කෙනෙක් ආරණ්‍යයේ ඉන්නවා. ඒත් අවශ්‍ය පහසුකම් මෙහි නැහැ. එක තැන ඉන්න කෙනෙක්ව ගොඩාක් පිරිසිදුව තියාගන්න ඕන. ඒත් හරිහැටි බොන්නවත් වතුර ටිකක් නැති තැනක එහෙම කෙනෙක් බලාගන්න එක මොනතරම් අපහසු දෙයක්ද කියලා ඔබට වැටහෙනවා ඇති. මෙහෙණින් වහන්සේහට උපස්ථාන කරන්න ඉන්න මේ නැන්දා බොහෝ දුරක් ගිහිනුයි අත්‍යාවශ්‍ය කටයුතු වලට ඕන කරන වතුර අරන් එන්නේ. ඒ වෙනුවෙන් ඇයට ගොඩක් වෙහෙසෙන්නත් සිද්ද වෙනවා. පවුලක් රකිනවා හා සමානව කිසිම ලාභ ප්‍රයෝජනයක් නොතකා මේ මෙහෙණින් වහන්සේ වෙනුවෙන් ඇප කැප වී උපස්ථාන කරන මැය සැබැවින්ම අගය කළ යුතුයි. ඇගේ පිහිට නොලබන්නට මේ වයෝවෘද්ධ මෙහෙණින් වහන්සේ සිටිය හැකි තත්වය ගැන සිතාගන්නවත් බැරි වේවි. දෑස් නොපෙනී ඇවිදින්නට බැරි කෙනෙක් හට තමන්ගේ කිසිදු කටයුත්තක් නිසියාකාරව කරගන්න බැරි බව ඔබට පැහැදිලි කළ යුතු නැහැ. ඉතින් මේ මෙහෙණින් වහන්සේට අත්‍යාවශ්‍යයම වන ජල පහසුකම නළ මාර්ග ඔස්සේ ආරණ්‍යටම ලබා දීමට අප කටයුතු සූදානම් කළා.
මේ වෙනුවෙන් දායකත්වය දක්වපු ෆේස්බුක් මිතුරන්ගේ සහයෝගය හේතුවෙන් මෙම මෙහෙණි ආරණ්‍යට පැය කිහිපයක් ඇතුලත නව ජල නල පද්ධතියක් මෙන්ම ජල ටැංකියක්ද පරිත්‍යාග කරන්නට අවස්ථාව ලැබුණා. ජල ටැංකිය ලබා දීමට එහි ගිය මොහොතේ පටන් නැවත එනතුරුම මේ පුන්‍යකර්මයට දායක වූ හැම කෙනෙක්ටම බොහෝ සේ පිං දුන්නා. කාලයක් පුරාවට බොහෝ දුරක් වතුර හොයාගෙන ගියත් දැන් මේ ආරණ්‍යට ජල පහසුකම ලැබී තියෙනවා. ඒ ගැන මේ මෙහෙණින් වහන්සේගේත් උන්වහන්සේහට උපස්ථාන කරන නැනදගේත් හිත්වල ඇති උන සතුට පිට උනේ අප්‍රමාණ ලෙස පිං දීමෙන්.
ලංකාව පුරා දවසින් දවස අළුත් ඉදි කිරීම් අලංකරණය කිරීම් එක්ක පන්සල් අළුත් වැඩියා වෙනවා. එකම දවසේ එකම දාන වේලට දායකයෝ දෙතුන් දෙනා භාර අරන් ඉන්න තරමට දානය පූජා කරන්න දායකයෝ ඔනෑතරම්. එහෙම පන්සල් අතරේ මේ වගේ දුෂ්කර ප්‍රදේශයක අවම පහසුකම්වත් නැති ආරණ්‍ය වල ඉන්න ස්වාමීන් වහන්සේලා මෙහෙණින් වහන්සේලා ගෙවන දුෂ්කර ජීවිත ගැන මොහොතක් අපි සිතා බැලිය යුතු වනවා. දාන වේල් වැඩියෙනුත් ලැබෙන පන්සල් අතරේ එක දාන වේලක්වත් නොලැබෙන මේ වගේ පන්සලුත් තියෙන බව බෞද්ධ ඔබ අප අවබෝධ කරගත යුතුයි. එවන් පූජනීය ස්ථාන වෙත අපට කළ හැකි යමක් වේ නම් එය හැකි පමණින් ඉටු කිරීම බෞද්ධ ඔබේත් මගේත් යුතුකමක්ද වනවා.
මේ උතුම් කටයුත්ත වෙනුවෙන් අප හා එක්ව දායකත්වය දැක්වූ බොහෝ මිතුරන් පිරිසක් සිටිනවා. ඔබ සැම මෙසේ දායක වූයේ උතුම් බුද්ධ ශාසනය රැක ගැනීමෙහිලා පැවිදි දිවි පෙවතකට එළඹ රෝගී තත්ව හමුවේ දුෂ්කර පැවිදි ජීවිතයක් ගෙවන්නට සිදු වූ මෙහෙණින් වහන්සේනමක් හටයි. එවන් උතුම් කුසලයක් සිදු කර ඔබ සැම රැස් කරගත්තාවූ පිනෙහි බලයෙන් මෙයට දායක වූ ඔබ සැමටත් ඔබේ පවුලේ සෑම සියළු දෙනා හටත් නිදුක් නීරෝගී සුවය උදා වේවා…. රෝගීව සිටින මෙහෙණින් වහන්සේ හට පිරිසිදු පානිය ජලය ලබා ගැනීමට දායක වූ පිනෙන් ඔබ සැමට යම් කාය චිත්ත පීඩාවක් වේ නම් ඒ සියල්ල දියෙහි ඇඳි ඉරක් සේ පහව යේවා… කිසිදු රෝගාබාධයකට ගොදුරු නොවේවා… කරන කියන යම් කටයුත්තක් වේ නම් ඒ සියල්ලක්මද රැකී රක්ෂා කටයුතුද අධ්‍යාපන කටයුතුද සියල්ලක්ම සර්වප්‍රකාරයෙන්ම සාර්ථක වේවා…. යම් උතුම් බලාපොරොත්තු ඔබ සැමගේ සිත් තුළ වේ නම් ඒ සියල්ල මුදුන්පත් කර ගැනීමට අවැසි ශක්තිය ධෛර්යය වාසනාව උදා වේවා…. මෙවන් කුසල් තව බොහෝ සේ රැස් කරගනිමින් අවසානයේ උතුම් වූ නිර්වාණාවබෝධය ලැබීමටද මෙම කුසලය හේතු වේවා….
මේ පිංකමට මාගේ සොහොයුරා Manoj Prasanna ශ්‍රම දායකත්වය දැක්වූවා.
සෙනෙහෙබර වදන් පෙළගැස්ම – Nimasha Sewwandi
Location : ඔක්කම්පිටිය, මොණරාගල
Post Date : 2017 September 24
Project Code : 2017-MON-0054
Project Status : Completed
Completed Date 2017 September 24
උදව්කල ෆේස්බුක් මිතුරු මිතුරියෝ : https://m.facebook.com/story.php?story_fbid=1425824444121561&id=100000820578834
© සමාජසත්කාර.lk | www.Samajasathkara.lk
Editing, reproducing and re-using these images for commercial purposes or otherwise, without permission of Samajasathkara.lk, are strictly prohibited and considered as intended copyrights infringement.
Photograph used for promotional purposes only!
Project Water – Water for Temples
An idea by Danesh Maduranga Edirisooriya & Danesh Maduranga Edirisooriya II
Project of SamajaSathkara.lk
